Мэргэшсэн зөвлөхөөс баттай мэдээлэл аваарай.

Шинэ Зеландад суралцах талаар зарим нэг буруу мэдээлэл, ташаа ойлголтууд яваад байгаа тул Та бүхэн баттай, сүүлийн үеийн мэдээллийг зөвхөн тус улсын мэргэшсэн Боловсролын зөвлөхөөс авч байгаарай. Манай Зөвлөх А.Одонзаяа (Гэрчилгээ NZCG #17) нь Хүний нөөцийн сургалт, хөгжил мэргэжлээр Англи улсад Магистрын зэрэг эзэмшиж, мэргэжлээрээ 10 гаруй жил ажилласан. Шинэ Зеландын топ их сургууль University of Auckland-д 2 жил суралцсан, мөн тус улсын боловсролоор мэргэшин, дагнан ажиллаж байгаа цор ганц Монгол зөвлөх юм. Мэргэжлийн профайлыг эндээс үзнэ үү.

А.Одонзаяа нь одоо гэр бүлийн хамт Auckland хотод танд хамгийн баттай мэдээллийг халуун цэг дээрээс хүргэн, ажиллаж амьдарч байна. Түүнд ирж байгаа түгээмэл асуулт, ташаа ойлголтыг залруулж, дараах мэдээллийг хүргүүлж байна. #шинэзеланд

• Боловсролын зууч бүр тухайн улсын боловсролын тогтолцоо, оюутны визний талаар мэдээлэл, зөвлөгөө өгөх эрхтэй, мэдлэг, чадвартай гэсэн үг биш. Боловсролын зөвлөгөө өгөх, боловсролын зууч хийх, визний зөвлөгөө өгөх нь тусдаа үйлчилгээ бас хариуцлага юм.

• Шинэ Зеландын Цагаачлалын албанаас визний зөвлөгөө өгөх лицензыг аваагүй л бол Боловсролын зуучууд оюутны визнээс бусад визэнд туслах, зөвлөх эрхгүй байдаг. Боловсролын зууч нь олон нийтэд нээлттэй тавигдсан ерөнхий мэдээллийг оюутнуудад тайлбарлах ойлгуулах боломжтой.

• Зеландын аяллын ба бусад төрлийн визны зөвлөгөөг зөвхөн Шинэ Зеландын хүчинтэй бөгөөд бүрэн лицензтэй Визний зөвлөхөөс (Fully licensed Immigration advisor) авах боломжтой байдаг. Таны визны зөвлөх бүртгэлтэй эсэхийг эндээс шалгаж болно.

• Хэрэв Англи хэлийг богино хугацаагаар буюу 3 хүртэлх сараар сурмаар байвал Visitor буюу Аяллын визтэйгээр сурч болно. Энэ визээр ажиллах боломжгүй. Зөвхөн 3+ сараар сурах бол оюутны виз хүснэ. Хэрэв анхан шатны Англи хэлтэй, илүү эрчимтэй, үр дүнтэй суръя гэвэл доод тал нь 6 сар бүтэн цагаар буюу 7 хоногт багадаа 20 цагаар суралцахыг санал болгодог.

• Оюутнууд 6 сараар хэлний бэлтгэлд ирээд дахин 6 сараар сургалтаа сунгах оюутны виз дотроосоо мэдүүлж байгаа нь дараагийн визний шийдвэрлэлтэд эергээр нөлөө үзүүлэх хүчин зүйл биш юм. Харин ч нэмэлт асуултууд гарч ирж, илүү зардал гаргах, цаг хугацаа алдах эрсдэл үүсгэдэг. Тиймээс эхнээсээ боловсролын зөвлөхтэй уулзаж, өөрийн сургалтын төлөвлөгөөгөө ярилцаж, өөрт тохирсон сургалтын ба санхүүгийн төлөвлөгөөгөө гаргах нь сэтгэл зүйн ба санхүүгийн дарамт багатай сурах боломжийг олгодог.

• Хэрвээ Та Шинэ Зеландад байхдаа оюутны виз мэдүүлж байгаа бол сургалтын төлбөрөө урьдчилан төлөхийг шаарддаг. Харин Шинэ Зеландын хилийн гаднаас оюутны виз мэдүүлж байвал визээ онлайнаар эхлээд өгөх ба виз урьдчилсан байдлаар батлагдсаны дараа сургалтын төлбөрөө төлөхийг зөвшөөрдөг. Виз мэдүүлэхээс өмнө сургалтын төлбөрөө урьдчилан төлөх нь визийг батлах давуу тал болохгүй. Учир нь төлсөн төлбөрийнхөө орлогын эх үүсвэрийг нотлох баримтыг виз мэдүүлэхдээ заавал өгөх ёстой.

• Ихэнх Магистрын хөтөлбөр 1.5 жил байдаг ба зарим нарийн мэргэжлийн Магистр 2 жил (жишээ нь Master of Counselling), зарим нь 1 жил байдаг. 1 жилийн Магистрын хөтөлбөрүүд зарим үед 1,5 жилийн хөтөлбөрийг шахсан байдаг. Магистрыг 1 эсвэл 2 жилээр суралцаад төгсөх нь сургалтын дараах ажлын визэнд нөлөөлөхгүй ба Магистрын Level 9 гэсэн боловсролын зэрэгтэй төгсөх нь чухал байдаг.

• Магистрын хөтөлбөрт суралцах гадаад оюутан бүрийн хүүхэд ЕБС-д төлбөргүй суралцах боломжгүй ба зөвхөн Магистрын оюутнаас хамааралтай ажлын визтэй аав/ээжийгээ дагалдах 5-17 насны хүүхэд улсын харьяаны ЕБС-д төлбөргүй суралцах боломжтой байдаг. Энэ нь Шинэ Зеландын бүх хот дүүрэгт ижил байдаг.

• Магистр төгсөөд шууд байнгын оршин суух, иргэншил авах одоогоор боломжгүй (2026 оны 8-р сараас өөрчлөлт орохоор яригдаж байна). Төгсөөд магадлан итгэмжлэгдсэн байгууллагад ямар ч төрлийн ажлыг 7 хоногт 30+ цагаар 1 жил хийж, тогтвортой ажлын байрны санал авсан үед оршин суух виз хүсэх эрх үүсдэг. 

• Тус улсад Бакалавр, Магистарт суръя гэж шийдвэл дотоодын 3-4 сарын NZCEL L4 (IELTS 6.0) эсвэл L5 (IELTS 6.5) түвшний академик Англи хэлний сургалт юм уу их сургуулийнхаа Англи хэлний бэлтгэл ангид суралцах нь илүү хялбар бас найдвартай ба IELTS шалгалт өгөлгүйгээр хөтөлбөртөө элсэх боломжтой байдаг. Магистрын хөтөлбөрт Англи хэлний оноо IELTS 6.5 -тэй тэнцэх чадвар шаарддаг ч, зарим нь IELTS 7.0 шаардана (жишээ нь Master of Laws, Master of ECE).

• Докторын хөтөлбөрт Англи хэлний оноо ихэнхдээ IELTS 6.5 ба Докторт сурахад дотоодын оюутны төлбөр төлж, хүүхдүүд улсын ЕБС-д сургуульд төлбөргүй суралцана.

• Тус улсын төрийн өмчит 8 их сургууль, 23 орчим политехник коллеж байдаг ба гадаад оюутанд хамгийн өндөр төлбөртэй байдаг. Харин хувийн дээд сургууль, коллежүүдэд гадаад оюутнууд сурах нь түгээмэл ба сургалтын чанар, төгсөөд авах боловсролын зэрэг, дипломын хувьд ижил байдаг, мөн сургалтын төлбөр бага, илүү уян хатан элсэлтийн системтэй, зорилтот зах зээлээсээ хамаарч, гадаад оюутнуудад сайн хөнгөлөлт, урамшуулал санал болгодог.

• Хувийн сургуулиудыг магадлан шалгаж, 1-4 түвшин, зэрэглэлд ангилдаг ба Category 1 түвшинтэй сургууль нь хамгийн найдвартай хувийн сургууль юм.

• Хөдөлмөрийн хөлсний доод хэмжээ 1 цагийн 23.15 NZ$ ба үүнээс бага цалин санал болгож байгаа бол ажил олгогч хөдөлмөрийн хууль зөрчиж байна. Тогооч хүн жишээ нь хамгийн багадаа 1 цагийн 30 NZ$, замын ажилтан 30 NZ$ авч байхад түргэн хоолны газрын зөөгч 24 NZ$-ын цалинтай байна.

• Шинэ Зеландад цар тахлын дараах эдийн засгийн хямрал үргэлжилсэн хэвээр байна гэж үзэж байгаа ба 2024-2025 онд ажлын олдоц сайнгүй байсан. 3-6 сараар сурах анхан шатны Англи хэлний оюутанд цагийн ажил олдохгүй гэж ойлгож болно. Мэдээж, тухайн хүний мэргэжил, гадаад хүмүүстэй харилцах, хамтран ажиллах чадвар, ажлын туршлагаас мэдээж хамаарна.

Танд асуулт байвал onzaeducation@gmail.com хаягаар бидэнд хандаарай.

А.Одонзаяа зөвлөхтэй цаг товлох бол энд дарна уу. www.onzoza.com. #onzaeducation #шинэзеландынзууч

ONZA Education